श्रम क्षेत्रका ६० महिला सम्मानित

विराटनगर । उद्योग संगठन माेरङ, महिला उद्यमी समितिले विभिन्न क्षेत्रमा याेगदान गर्ने व्यक्तिलाई सम्मान गरेकाे छ । १११ औं अन्तर्राष्ट्रिय श्रमिक महिला दिवसकाे अवसरमा आयाेजित कार्यक्रममा काेभिडका बिच याेगदान गर्ने स्वास्थ्यकर्मी, महिला प्रहरी, श्रमिक महिलालाई सम्मान गरेकाे हाे ।

कार्यक्रममा स्वास्थ्यकर्मी ४० जना , प्रहरी ५ जना, श्रम क्षेत्रका १५ जना सम्मानित भएकाे महिला उद्यमी समितिका संयाेजक सन्ताेष जैनले बताइन् ।

कार्यक्रममा बाेल्दै उद्याेग संगठन माेरङका अध्यक्ष भिम घिमिरे विपद् र आपतकाे समयमा मानवीय सेवामा लागेका, सुरक्षा, स्वास्थ्य र श्रम क्षेत्रमा काम गरेका महिलालाई सम्मान गरेकाे बताए । काेभिडले विक्षिप्त पारेकाे अवस्थामा उनीहरूको याेगदान अत्यन्तै ठूलाे रहेकाे भन्दै प्रशंसा गरे ।

आमा, बुबा, छाेरा-छाेरी नभनी काेभिडमा पनि सडकमा निस्केर काम गर्ने प्रहरी र लकडाउनकाे बेला पनि काम गरेर उद्योग बन्द हुन नदिने भूमिका खेलेका श्रमिक महिलाप्रति उनले खुसी व्यक्त गरे ।

सामाजिक विकास मन्त्रालयका उपसचिव दुर्गा भण्डारीले यस्ता कार्यक्रम परिस्कृत हुँदै गएकाले अभियानकै रूपमा अघि बढेकाे सुनाइन् । ‘एकैदिन ७ वटा कार्यक्रम विराटनगरमा भएकाे छ,’ उनले भनिन्, ‘सबैले महिलाकाे सम्मान व्यवहारिक रूपमा आफ्नाे घरबाट नै हुने हाे भने सार्थकता पाउनेछ ।’ उनले नेपालको कानुन नमूना भएकाे बताउँदै ऐन कानुन दक्षिण एसियाकै उत्कृष्ट रहेकाे भएपनि अझै अधिकारकाे कुरा भने उठाइरहनु परेकाे सुनाइन् ।