मकालु खबर
ताजा, शुलभ, निष्पक्ष

वामदेवले मागे प्रधानमन्त्री ओलीको राजीनामा

काठमाडौँ । नेपाल कम्युनिष्ट पार्टी नेकपाका उपाध्यक्ष वामदेव गौतमले प्रधानमन्त्री केपी शर्मा ओलीलाई तत्काल राजीनामा दिन आग्रह गरेका छन् । संसद विघटन बदर भएपछि प्रेस विज्ञप्ति जारी गर्दै गौतमले प्रधानमन्त्री पदबाट ढिलो नगरी राजीनामा दिन आग्रह गरेको हुन् ।

साथै उनले नेकपाको सचिवालय बैठक पार्टी कार्यालय धुम्बाराहीमा तत्काल डाक्न अध्यक्ष ओली र पुष्पकमल दाहाललाई आग्रह गरे । ‘नेपाल कम्युनिष्ट पार्टी (नेकपा)को उपाध्यक्षको हैसियतले म दुवै अध्यक्ष क. केपी शर्मा ओली र क. प्रचण्डसँग तुरुन्तै सचिवालय बैठक धुम्बाराहीस्थित पार्टीको केन्द्रीय कार्यालयमा बोलाउन अनुरोध गर्छु ।’

गौतमले संघीय लोकतान्त्रिक गणतन्त्र नेपालको संविधान जारी भए यता २०७७ साल फागुन ११गतेको दिन ऐतिहासिक महत्वको रहेको पनि उल्लेख गरेका छन् ।

  • हेर्नुहोस् विज्ञप्ति :-

संघीय लोकतान्त्रिक गणतन्त्र नेपालको संविधान जारी भएयता वि‍. सं २०७७ साल फागुन ११ गतेका दिन
ऐतिहासिक महत्वको रहेको छ । यो दिन हाम्रो सम्मानित सर्वोच्च अदालतले हजारौं सपुतहरुको बलिदान तथा लाखौं देशभक्त नेपालीको त्याग र समर्पणबाट प्राप्त नेपालको संविधानको संरक्षण गरेको दिन हो ।

प्रधानमन्त्री केपी शर्मा ओलीले गत पुस ५ गते गर्नु भएको प्रतिनिधि सभा विघटन असंवैधानिक ठहर भएको छ। आजको दिन निरंकुशता स्वेच्छाचारिता, अराजकता र दुराचारिताको पराजय तथा संविधान, कानुन, लोकतन्त्र र जनताको सर्वभौमिकताले पुनर्विजय प्राप्त गरेको ऐतिहासिक दिन हो ।

यस अवसरमा म सर्वप्रथम प्रधानन्यायाधीश र संवैधानिक इजलासका न्यायाधीशहरुमा आभार प्रकट गर्दै वहाँहरुलाई हार्दिक धन्यवाद दिन्छु ।

यस अवसरमा म नेपालको नागरिकको हैसियतले निम्नलिखित माग राख्दछु :

१. सम्माननीय राष्ट्रपति महोदयले प्रेस विज्ञप्तिमार्फत संवैधानिक इजलासको निर्णयलाई हार्दिक स्वागत गर्दै प्रतिनिधि सभा अधिवेशन आह्वान गर्नुपर्छ ।

२. प्रधानमन्त्री केपी शर्मा ओलीले प्रधानमन्त्री पदबाट ढिला नगरी तुरुन्त राजीनामा दिनुपर्छ ।

३. नेपाल कम्युनिस्ट पार्टी (नेकपा) को उपाध्यक्षको हैसियतले म दुवै अध्यक्ष क. केपी शर्मा ओली र क. प्रचण्डसँग तुरुन्तै सचिवालय बैठक धुम्बाराहीस्थित पार्टीको केन्द्रीय कार्यालयमा बोलाउन अनुरोध गर्छु ।

वामदेव गौतम

उपाध्यक्ष
नेपाल कम्युनिस्ट पार्टी (नेकपा)
१२।११।२०७७

प्रतिकृयाहरु
Loading...