पुल उद्घाटन गर्न दाङ जाँदै प्रधानमन्त्री

काठमाडौँ । प्रधानमन्त्री केपी शर्मा ओली लुम्बिनी प्रदेशको राजधानी दाङ जाँदैछन् । दाङ देउखुरीस्थित राप्ती नदीमा बनेको नेपालको दोस्रो लामो पुल उद्घाटन गर्न प्रधानमन्त्री साेमबार दाङ जान लागेका हुन् ।

गत बर्ष नै राप्ती गाउँपालिकाको सिसहनियाँ र गढवा गाउँपालिकाको महदेवा जोड्नेगरी नेपालकै दोस्रो लामो पक्की पुल निर्माण भएको थियो । करिब एक अर्ब लागतमा चार वर्षभित्र निर्माण सम्पन्न गर्ने लक्ष्य भए पनि निर्धारित समय अगावै पुल निर्माण सम्पन्न भएको थियो । पुलको शिलान्यास भने तत्कालीन प्रधानमन्त्री पुष्पकमल दाहाल ‘प्रचण्ड’ ले २०७३ मंसिर २२ गते गरेका थिए ।

पुल उद्घाटन सकेपछि प्रधानमन्त्रीले राप्ती गाउँपालिका-२ लालमटीयामा हुने सभालाई सम्बोधन गर्ने कार्यक्रम छ । प्रधानमन्त्रीको आगमनलाई लक्षित गरी देउखुरीको सुरक्षा व्यवस्था कडा पारिएको छ ।