मकालु खबर
ताजा, शुलभ, निष्पक्ष

कविता/कवि [शनिबारीय कोशेली]

कविता/कवि

तिम्रो हरेक हेराइमा
मेरो पौरुष डगमगाउने
तिम्रो हरेक हँसाइमा
जीवन वासना मगमगाउने
लहराउँदै सबै यौवन तिम्रै वरीपरी
तर कहाँ तिमी कलियुगकी मेनका
अनि कहाँ म एउटा अस्तित्वहीन कवि

तिम्रो हरेक आगमनमा
दिवास्वप्न तलतलाउने
तिम्रो हरेक निर्गमनमा
उपेक्षा लहर सलबलाउने
रङ्गाउँदै एक स्पर्शको चाह मुटुभरी
तर कहाँ तिमी मोटर सवार मोहिनी
अनि कहाँ म एउटा पैदल हिँड्ने कवि

तिम्रो हरेक सम्झनामा
मेरो बैंस भुनभुनाउने
तिम्रो हरेक तिर्सनामा
जोवनको लय गुनगुनाउने
सुम्सुमाउँदै मोह यो कस्तो आदत सरी
तर कहाँ तिमी छन्द अनुप्रासकी कविता
अनि कहाँ म एउटा मामूली गद्य कवि

–अमीर मगर

प्रतिकृयाहरु
Loading...