‘प्रधानमन्त्री ओलीले राजीनामा दिँदा नै उचित हुन्छ’ अध्यक्ष जबरा

चैत्र १, काठमाडौं । वर्तमान प्रधानमन्त्री केपी शर्मा ओलीले तत्काल राजीनामा दिनुपर्ने राष्ट्रिय प्रजातन्त्र पार्टीका अध्यक्ष पशुपति शमशेर जबराले बताएका छन् । प्रधानमन्त्रीको स्वास्थ्य अवस्थाका कारण मुलुकको बागडोर संहाल्न नसक्ने भन्दै उनले राजिनामा दिनुपर्ने सुझाए ।  ‘उहाँले जे–जे गर्दा आराम गर्न सक्नुहुन्छ, त्यो गर्नुपर्छ । मुलुक चलाउन सक्नुहुन्न ।’ उनले भने । 

शनिबार रिपोर्टर्समा बोल्दै अध्यक्ष जबराले प्रधानमन्त्री ओलीले स्वस्थ हुँदापनि मुलुकप्रतिको कर्तव्य निर्वाह गर्न नसकेको टिप्पणी गरे । ‘उहाँ स्वस्थ हुँदापनि मुलुकप्रतिको कर्तव्य निर्वाह गर्नुभएको थिएन । त्यसैले राजीनामा दिँदा नै उचित हुन्छ ।’ 

उनले प्रधानमन्त्री ओलीमात्रै नभएर सत्तारुढ दल नेपाल कम्युनिष्ट पार्टी (नेकपा) नै मुलुकप्रतिको आफ्नो कर्तव्यमा चुकेको आरोप लगाए । वर्तमान सरकारले जनतालाई कुनैपनि किसिमको सेवा प्रदान गर्न नसकेको गम्भिर आरोप लगाए । उनले भने,‘जनताले बहुमत दिएर यो सरकारलाई पठाएपनि कुनैपनि किसिमको सेवा दिन सकेन । सरकार सेवा दिने कुरामा असफल भयो ।’ 

अध्यक्ष जबराले नेकपाले गाउँ–गाउँसम्म भ्रष्टाचार विकेन्द्रीकरण गरेको पनि आरोप लगाए । ‘अहिले व्यापक भ्रष्टाचार बढेको छ । सरकारले काण्डै काण्ड घटाएको छ । ललितानिवास काण्ड, बुढीगण्डकी काण्ड, सेक्युरिटी प्रिन्टिङ प्रेस खरिद प्रकरण, संवैधानिक निकायमा राजनीतिकरण भएको छ । न्यायालयमा त झनै बढि राजनीतिकरण भयो ।’ उनले भने । वर्तमान सरकार सबै फाँटमा असफल भएको उनको टिप्पणी छ ।   

उनले विदेश नीतिमा पनि सरकार असफल भएको दाबी गरे । ‘अमेरिकी सहयोग एमसीसी लिने सवालमा त नेकपाले कार्यदल बनाएर गाईजात्रा देखायो ।’ त्यस्तै, प्रमुख प्रतिपक्षी दल नेपाली कांग्रेसले पनि मुलुकमा बेथिति र विसंगति हुँदापनि कुनै किसिमको खबरदारी गर्न नसकेको उनको अर्को आरोप छ ।   

उनले मुलुकको यस्तो अवस्थामा आफूहरु राष्ट्रवादी शक्तिहरु एकजुट भई औंला ठड्याएर बोल्नको लागि एकता गरेको विश्वास दिलाए । आफूहरुले सबै पक्षलाई स्विकार्य हुनेगरि साझा संस्थाको रुपमा राजसंस्था हुनुपर्ने कुरा गरेको सुनाए ।   

‘हामीले सबै पक्षलाई स्विकार्य हुनेगरि साझा संस्थाको रुपमा राजसंस्थासहित प्रजातन्त्रको कुरा गरेका छौं ।’ यद्धपी उनले आफूहरु संविधानप्रति पूर्ण प्रतिबद्ध रहेको स्पष्ट पारे । उनले भने,‘हामीले संविधान जारी गर्दापनि केही असहमति राखेका थियौं, खासगरी हिन्दूधर्मको बारेमा, हामीले संशोधनपनि हालेका थियौं ।’ 

उनले राजसंस्था नेपालको पूराना संस्था भएकोले यसले निश्पक्ष भूमिका निर्वाह गर्न सक्ने बताए । ‘राजसंस्थाको लागि वादविवाद, बहस जारी राखौं, सबै पक्षलाई राजसंस्था स्विकार्य गर्नको लागि हामी बहस तथा पैरवी गर्छौं ।’ 

संविधान जारी गर्दा राप्रपापनि चार दलमध्ये एक शक्ति भएकोले आफूहरु संविधानप्रति प्रतिबद्ध रहेको उनको भनाई छ । उनले हिन्दूराष्ट्र बनाउनको लागि मुलुकभरि राजनीति परिचालन गरिने सुनाए । आफूहरुको एकता नेपाली जनतालाई अहिलेको अवस्थाबाट उद्दार गर्नपनि भएको भन्दै त्यसको लागि पार्टी तयार रहेको सुनाए ।   

भारतीय प्रधानमन्त्री नरेन्द्र मोदीले कोरोना भाइरसविरुद्ध लड्न सार्क सदस्य राष्ट्र एक भएर लड्नुपर्ने भनेर राखेको प्रस्ताव सकारात्मक भएको उनले स्पष्ट पारे । उनले भने,‘हाम्रो सरकार त कोरोना भाइरसबारे लापरवाही गरेर बसेको छ । सेल्फ क्वारेन्टाईनमा बस्नुपर्ने कुरा गरेको छ । सरकारको यो कदम चिन्ताजनक र निन्दनीय छ ।’ उनले मोदीको पहल राम्रो भएको बताए । 

हरेक वर्ष नेपालको बजेटको ३०/४० प्रतिशत खर्च नहुने गरेको सुनाउँदै अध्यक्ष जबराले कोरोनाबाट बच्नको लागि चाहिने अत्यावश्क ईक्युपमेन्ट, प्रोटेक्शन क्लोथ, मास्क लगायतका सामाग्री खरिद गर्न सरकारलाई आग्रह गरे ।  फरक प्रसंगमा उनले सुनिल थापाले पार्टी छोडेको भन्ने प्रश्नमा सत्यता नभएको स्पष्ट पारे । उनले भने,‘सुनिल थापाले पार्टी छोड्नु भएको छैन । केही रिजर्भेशन राखेको छ ।’