प्रधानमन्त्रीले बालुवाटारमा नेकपा सांसदलाई रात्रिभोज दिने

माघ १९, काठमाडौं । प्रधानमन्त्री केपी शर्मा ओलीले आज (आइतबार) साँझ रात्रिभोजको आयोजना गर्ने भएका छन् ।   

सत्तारुढ नेकपाले प्रधानमन्त्रीले रात्रिभोजको आयोजना गर्ने उल्लेख गर्दै राष्ट्रिय सभा र प्रतिनिधि सभाका सबै सदस्यहरु तथा सांसदहरुलाई साँझ ६ बजे बालुवाटारमा अनिवार्य उपस्थित हुन ह्विप जारी गरेको छ ।   

रात्रिभोजमा सहभागी हुन नेकपाका सबै सांसदहरूको मोबाइलमा सन्देश पठाइएको छ । सन्देशमा लेखिएको छ– ‘२०७६/१०/१९ गते साँझ ६ बजे पिएम निवास बालुवाटारमा रात्रिभोज आयोजना गरिने भएको हुँदा उपस्थितिका लागि अनुरोध गरिन्छ। ह्विप। सिपिएन।’ 

मिलेनियम च्यालेन्ज कर्पोरेसन (एमसीसी) बारे छलफल गर्न रात्रिभोज आयोजना गरिएको हुन सक्ने केही सांसदकाे अनुमान छ ।