चित्र बहादुर केसीको भनाईः ‘संघियता क्यान्सर हो’

बैशाख २, काठमाडौं । राष्ट्रिय जनमोर्चाका अध्यक्ष एवम् पूर्व उपप्रधानमन्त्री चित्रबहादुर केसीले संसदमा पेश गरिएको नागरिकता विधेयक तत्काल खारेज नगरे राष्ट्रियता नै खतरामा पर्ने आशंका व्यक्त गरेका छन् । 

दोस्रो चन्द्रागिरी महोत्सवमा बोल्दै अध्यक्ष केसीले सदनमा पेश गरिएको नागरिकता विधेयक तत्काल खारेज नगरे नेपालको अस्तित्व नै समाप्त हुने खतरा औंल्याएका हुन् । 

‘नागरिकता विधेयक सदनमा छलफलकै क्रममा छ, तर मन्त्रिपरिषदको बैठकले देशैभरिका जिल्ला प्रशासन कार्यालयलाई अङ्गीकृत नागरिकका सन्तानलाई वंशजको आधारमा नागरिकता दिन सर्कुलर जारी गरेको छ । यो अत्यन्तै गम्भीर र गलत कुरा हो, तत्काल खारेज गर्नुपर्छ ।’ उनले भने । 

null

केसी यो विधेयकले नेपालमा जन्मिएका वास्तविक नागरिकहरुलाई नागरिकता दिनबाट बञ्चित गराइने र विदेशबाट आएकाहरुलाई नागरिकता दिने बाटो खोलिदिएको आरोप लगाए । 

फरक प्रशंगमा नेता केसीले संघियता क्यान्सर रोग जस्तै भएको र यसको कुनै तुक नरहेकाले यसलाई खारेजी गर्नुपर्ने जरुरी रहेको समेत स्पष्ट पारे । ‘संघियता क्यान्सर हो, बेलैमा नफाले पुरै देशलाई नै नष्ट गर्छ ।’ सुरु देखीनै संघीयताको बिपक्षमा वकालत गर्दै आएको राष्ट्रिय जनमोर्चाका अध्यक्ष केसीले भने, ‘अहिले संघियताको विषयमा अरु दलको पनि ओठ मुख सुकेको छ अन्य दललाई पनि यो खासै स्वीकार्य छैन । पहिले फसेको हुनाले उम्कन नसकेको मात्र हो ।’ 

आफूले सबै दलको नाडि छामेको भन्दै संघियता लागू गर्छौैं भन्ने दलहरु पनि अहिले पछुताउन लागेको उनले बताए । 

कार्यक्रममा चन्द्रागिरी महोत्सवका सह संयोजक तथा प्रचार प्रसार संयोजक रोसन दानीले चन्द्रागिरी नगरलाई देशकै नमुना नगरको विकास गर्न नगरका सवै युवाहरु लाग्नु पर्ने वताए । 

चन्द्रागिरी नगरपालिका र देवदर्शन मिडिया ग्रुपले आयोजना गरेको महोत्सवमा राष्ट्रिय जनमोर्चाका अध्यक्ष केसीले चन्द्रागिरीको ऐतिहासिक तथा पर्यटकीय क्षेत्रको बारेमा समेत प्रशंसा गरे । 

चन्द्रागिरी महोत्सवमा आएका गायक सरोज लामिछानेको गीतमा नेता केसी र चन्द्रागिरी हिल्सका प्रबन्ध निर्देशक अभिषेक विक्रम शाहले छलछमी नाचेका थिए ।