लेबनानमा सैन्य हस्तक्षेप गर्ने सिरियाको कुनै मनशाय छैनः विदेश प्रमुख अल–शैबानी

काठमाडौं । सिरियाका विदेश मामिला प्रमुख असाद अल–शैबानीले सिरियाको लेबनानमा सैन्य हस्तक्षेप गर्ने कुनै सोच वा मनसाय नरहेको स्पष्ट पारेका छन् ।

लेबनानको औपचारिक भ्रमणका क्रममा उनले सिरियाली अधिकारीहरू आपसी सम्मान र लेबनानको स्थिरतामा आधारित सम्बन्ध निर्माण गर्न इच्छुक रहेको बताए । लेबनानको बाब्दास्थित राष्ट्रपति भवनमा राष्ट्रपति जोसेफ आउनसँगको भेटवार्तापछि पत्रकारहरूसँग बोल्दै अल–शैबानीले भने, ‘लेबनानमा सम्भावित सिरियाली सैन्य हस्तक्षेपका बारेमा बाहिर आएका भ्रमपूर्ण रिपोर्टहरूलाई चिर्न सिरियाली प्रतिनिधिमण्डल आएको हो । सिरियाले यस्तो कुनै पनि कदम चाल्ने मनसाय राखेको छैन ।’

भेटका क्रममा अल–शैबानीले सिरियाली सरकार लेबनानको स्वायत्त निर्णयको सम्मान गर्ने र द्विपक्षीय सम्बन्धलाई थप मजबुत बनाउन प्रतिबद्ध रहेको उल्लेख गरे ।

उनले लेबनानको स्थिरता सिरियाको पनि हितमा रहेकोमा जोड दिए । सिरियाली नेतृत्वले विगतका आपसी हस्तक्षेपहरूलाई अन्त्य गर्दै सबै लेबनानी पक्षहरूसँग सहकार्य बढाउन र सबै क्षेत्रमा द्विपक्षीय सम्बन्धलाई सुदृढ गर्न चाहेको उनले बताए ।

सो अवसरमा सिरियाली पक्षले खाडी मुलुकहरूसँग मिलेर लेबनान–सिरिया आर्थिक साझेदारी निर्माण गर्ने प्रस्ताव समेत अघि सारेको छ । आर्थिक, ऊर्जा र अन्य क्षेत्रमा सहकार्य विस्तार गर्न नवगठित संयुक्त उच्च समितिको भूमिका महत्त्वपूर्ण हुने अल–शैबानीले उल्लेख गरे ।

लेबनानी राष्ट्रपतिको कार्यालयद्वारा जारी विज्ञप्तिअनुसार राष्ट्रपति आउनले सिरियासँगको भ्रातृत्वपूर्ण सम्बन्धलाई सहकार्य, समन्वय र एकअर्काको आन्तरिक मामिलामा अहस्तक्षेपको सिद्धान्तमा आधारित बनाउन लेबनान प्रतिबद्ध रहेको पुनः पुष्टि गरेका छन् । उनले संयुक्त उच्च समितिको गठनको स्वागत गर्दै सिरियाली अन्तरिम नेता अहमद अल–शाराको सिरियाको भूमिका विगतको जस्तो हुनेछैन भन्ने भनाइको प्रशंसा गरे ।