श्रम ऐन लागू गर्न माग गर्दै प्रशिक्षार्थी चिकित्सकहरू आन्दोलित

काठमाडौँ । श्रम ऐन लागू गर्न माग गर्दै प्रशिक्षार्थी चिकित्सकहरू आन्दोलित भएका छन् ।

शनिवार काठमाडौँको माइतीघर मण्डलामा हप्तामा एक दिन बिदा दिन र दैनिक १२ घण्टासम्म मात्रै काम गर्ने वातावरण मिलाउन माग गर्दै आन्दोलित भएका हुन् ।

उनीहरूले युवा तथा प्रशिक्षार्थी चिकित्सकको श्रम शोषण बन्द गर्न माग गरेका छन् । प्रदर्शनरत एमबिबिएस उत्तीर्ण चिकित्सक डा. प्रज्ञान बस्नेतले नेपालमा एमबिबिएस पास गरेपछि एक वर्ष इन्टर्नसिप गर्नुपर्छ । एक वर्ष काम गरेर मात्र एमडिको अध्ययन गर्न पाइने तर आफूजस्ता चिकित्सकहरू राम्रो अंक ल्याएपनि नेपालको उच्च शिक्षामा रहेको शोषणका कारण एमडि अध्ययन गर्न नसकेको बताए ।

चिकित्सकहरूले लगातार ३६ घण्टासम्म काम गर्नुपर्ने र अहिले देशमा दुई दिन बिदा दिइएको समयमा पनि एक दिन पनि आफूहरूलाई बिदा नदिइएको भन्दै आपत्ति जनाए । मेडिकल माफिया र केही शिक्षण अस्पतालहरूको आम्दानीको श्रोतको लागि देशको मेधावी पुस्ता श्रम शोषणमा परिरहेको उनको जिकिर छ ।

देशमा सरकार, मन्त्रीहरू फेरिएर काँग्रेस, कम्युनिष्टबाट जेन–जी र बालेनको सरकार आएपनि चिकित्सकहरूको समस्या जनको त्यहीँ रहेको भन्दै दुःख व्यक्त गरे । अधिकतम दिनमा १२ घण्टाको ड्युटी र हप्तामा एक दिन बिदा होस् भन्ने साधारण माग आफूहरूको रहेको उनको भनाइ छ ।

उनले भने ‘नेपालमा एमबिबिएस पास गरेपछि एक वर्ष इन्टर्नसिप गर्नुपर्छ । एक वर्ष काम गरेर मात्र एमडिको अध्ययन गर्न पाइन्छ । तर म यस्तो एक चिकित्सक हो । जसले बारम्बार नेपालको परीक्षामा राम्रो अंक ल्याए पनि नेपालमा एमडि पढ्न सकेको छैन । किनभने नेपालको उच्च शिक्षामा चरम श्रम शोषण छ । हामी डाक्टरको एकै पटक ३६ घण्टा ड्युटी हुन्छ । आम जनसाधारणले सोच्न पनि सक्दैन, कसरी ३६ घण्टा काम हुन्छ । जबकि दिनमा २४ घण्टा हुन्छ । हामी आज बिहान ७ बजे गयौँ भने भोलि बेलुका सात बजेसम्म ड्युटी हुन्छ । अहिले देशमा दुई दिन बिदा दिने चलन छ, तर हाम्रो हप्तामा एक दिन पनि बिदा हुँदैन, हामी ३६५ दिन नै खटिनुपर्ने हुन्छ । यो सबै केही मेडिकल माफिया र केही शिक्षण अस्पतालहरूको आम्दानीको श्रोतको लागि देशको मेधावी पुस्ता श्रम शोषणमा परिरहेका छौँ । देशमा सरकार फेरियो, मन्त्रीहरू फेरिए, काँग्रेस, कम्युनिष्टबाट जेन–जी र बालेनको सरकार आयो । तर पनि हामी अझै ३६ घण्टाको ड्युटी गर्न बाध्य छौँ । हामी युवा तथा प्रशिक्षार्थी चिकित्सकहरू नेपालको श्रम ऐन हामीलाई पनि लागू होस्, अधिकतम दिनमा १२ घण्टाको ड्युटी होस् र हप्तामा एक दिन बिदा होस् भन्ने साधारण माग राखेर हामी आन्दोलन गर्न बाध्य छौँ । हाम्रो माग समयमै पूरा होस् । हामीलाई न्याय दे सरकार ।’

प्रदर्शनरत प्रशिक्षार्थी चिकित्सकहरूले युवा तथा प्रशिक्षार्थी चिकित्सकको श्रम शोषण बन्द गर्, मलाई बोल्न दे सरकार, स्वास्थ्यकर्मीको चमेली बोलिदिने कोही छैन, डाक्टरको ३६ घण्टे ड्युटी खारेज गर, प्रशिक्षार्थी चिकित्सकलाई श्रम ऐन लागू गर, सुत्केरीको उपचार गर्ने महिला डाक्टरलाई खोइ सुत्केरी बिदा रु रातभर नसुतेको डाक्टर बिरामी छ, स्वास्थ्य सेवा बिरामी छ, देश बिरामी छ लगायतका प्लेकार्ड बोकेर प्रदर्शन गरेका हुन् ।