सरकारले प्रतिशोधपूर्ण गतिविधि नगरोस्ः अध्यक्ष शर्मा

काठमाडाैं । नेपाल पत्रकार महासंघकी अध्यक्ष निर्मला शर्माले सरकारलाई प्रतिशोधपूर्ण तरिकाले कुनैपनि गतिविधि नगर्न चेतावनी दिएकी छन् । पत्रकारहरू जहिले पनि ‘वाचडग’ को रूपमा रहने उल्लेख गर्दै उनले सरकारका क्रियाकलापहरूमाथि महासंघले निगरानी गरिरहेको बताइन् ।

सोमबार महासंघको स्थापना दिवसको अवसरमा आयोजित प्रभातफेरी कार्यक्रमपछि बोल्द उनले यस्तो बताएकी हुन् । अध्यक्ष शर्माले अभिव्यक्ति स्वतन्त्रता कुण्ठित हुने काम कतैबाट भएमा पत्रकार महासंघ नागरिक अगुवा संस्थाको हिसावले सशक्त रूपमा उभिने स्पष्ट पारिन् ।

शर्माले नागरिक अगुवा संस्थाहरूको एलायन्स ‘पाफर्ड’ र नेपाल बार एशोसिएशनसँगको सहकार्यमा महासंघ अगाडि बढ्ने पनि जानकारी दिइन् । कतिपय कानूनहरू बन्ने क्रममा रहेको र कतिपय अवस्थामा संविधानले दिएको अधिकार प्रयोग गर्न नपाउने गरी कानूनहरू आउन लागेकोमा उनकाे चिन्ता छ ।

उनलने भनिन्, ‘अहिले निर्वाचित सरकारले संविधान र कानूनसम्मत भन्दा पनि प्रतिशोधपूर्ण तरिकाले कुनै पनि गतिविधि नगरोस् भनेर हामी उहाँहरूलाई भन्न चाहन्छौँ । किनभन्दा पत्रकार भनेको जहिले पनि वाचडगको रूपमा रहेको हुन्छ । अहिले सामाजिक सञ्जालको प्रयोगले गर्दा मिडिया माथिको विश्वसनीयता गुम्दैछ । जिम्मेवार पत्रकारिताका लागि हामीले लामो लडाई लड्नुपर्नेछ ।’

महासंघले देशभरका पत्रकारहरूलाई एकताबद्ध भएर अगाडि बढ्न आह्वान गर्दै श्रम अधिकारको संरक्षण र अभिव्यक्ति स्वतन्त्रताको रक्षाका लागि आफ्नो अभियान जारी राख्ने प्रतिबद्धता समेत व्यक्त गरेको छ । –न्युज एजेन्सी नेपाल