अमेरिकी-इजरायली आक्रमणका बीच इरानीहरूले कुड्स दिवस मनाए
मकालु खबर
काठमाडौं । प्यालेस्टिनीहरूलाई समर्थन र इजरायली कदमहरूको निन्दा व्यक्त गर्ने वार्षिक कार्यक्रम अन्तर्राष्ट्रिय कुड्स दिवस मनाउन इरानभरका मानिसहरू सडकमा उत्रिएका छन् । सन् १९७९ मा इरानद्वारा स्थापित यो कार्यक्रम रमजानको उपवास महिनाको अन्तिम शुक्रबार मनाइन्छ । यस वर्ष यो मार्च १३ मा र इरानमाथि जारी अमेरिका-इजरायली हवाई आक्रमणका बीच परेको छ ।
राजधानीमा मानिसहरूले इरानको झण्डा फहराउँदै र इरानका दिवंगत सर्वोच्च नेता अली खामेनी र उनकै उत्तराधिकारी मोज्ताबा खामेनीका तस्बिरहरू बोकेर १० फरक स्थानबाट मध्य तेहरानको प्रसिद्ध एङ्गेलाव स्क्वायरतर्फ मार्च गरे । प्रदर्शनकारीहरूले संयुक्त राज्य अमेरिका र इजरायलले गरेका अपराधहरूको निन्दा गरे । इरानी सशस्त्र बलप्रति आफ्नो समर्थन व्यक्त गरे र नयाँ सर्वोच्च नेताप्रति निष्ठाको प्रतिबद्धता जनाए ।
तेहरानमा आयोजित र्यालीमा राष्ट्रपति मसुद पेजेस्कियान, सर्वोच्च राष्ट्रिय सुरक्षा परिषद्का सचिव अली लारीजानी, न्यायपालिका प्रमुख गुलामहोसेन मोहसेनी-इजेईका साथै परराष्ट्रमन्त्री सैयद अब्बास अराघची जस्ता मन्त्रिपरिषद्का सदस्यहरू लगायत धेरै उच्च पदस्थ इरानी अधिकारीहरूले पनि भाग लिएका थिए । आधिकारिक समाचार एजेन्सी इर्नाका अनुसार र्याली सुरु भएको केही मिनेटमै र्याली मार्ग नजिकैको तेहरानको मध्य क्षेत्रमा अमेरिका र इजरायलले हवाई आक्रमण गरेका थिए । जसमा परी एक जनाको मृत्यु भएको छ ।
फेब्रुअरी २८ मा, इजरायल र संयुक्त राज्य अमेरिकाले तेहरान र अन्य धेरै इरानी सहरहरूमा संयुक्त आक्रमण गरेका थिए । जसमा इरानका तत्कालीन सर्वोच्च नेता अली खामेनीका साथै वरिष्ठ सैन्य कमान्डर र सर्वसाधारणको मृत्यु भएको थियो । इरानले इजरायल र मध्यपूर्वमा रहेका अमेरिकी अड्डाहरू र संयन्त्रहरूलाई लक्षित गरी मिसाइल र ड्रोन आक्रमणहरूको लहर सुरु गरेर यसको जवाफ दिएको थियो ।
मकालु खबर
