आतङ्कवादविरूद्धको लडाइमा सहकार्य गर्ने इजरायलसँग सहमति भयोः मोदी

एजेन्सी । भारत र इजरायलले आतङ्कवादविरूद्धको लडाईँमा सहकार्य गर्ने प्रतिबद्धता व्यक्त गरेको भारतका प्रधानमन्त्री नरेन्द्र मोदीले बिहीबार इजरायलको भ्रमणका शिलशिलामा बताएका छन् ।

सन् २०१४ मा प्रधानमन्त्री बनेयता प्रधानमन्त्रीका रूपमा मोदीको यो दोस्रो इजरायल भ्रमण हो ।

जेरुसेलममा इजरायली प्रधानमन्त्री बेन्जामिन नेतान्याहुसँगको भेटवार्तामा भारतीय प्रधानमन्त्री मोदीले भने “भारत र इजरायल विश्वमा आतङ्कवादका लागि कुनै ठाउँ छैन भन्ने कुरामा स्पष्ट छन् । हामी काँधमा काँध मिलाएर आतङ्कवादविरूद्ध अभिनेछौँ ।”

उनले थपे “मानवता कहिल्यै पनि द्वन्द्वको शिकार बन्नु हुँदैन ।” एक दिनअघि इजरायलको संसदलाई सम्बोधन गरेका प्रधानमन्त्री मोदीले इजरायल र भारतबीच भविष्यमा प्रविधि र ऊर्जासहित विभिन्न क्षेत्रमा सहकार्यको चर्चा गरेका थिए ।

“हामी मिलेर संयुक्त विकास, उत्पादन र प्रविधि हस्तान्तरणका दिशामा अघि बढ्नेछौँ,” उनले भने ।

उनले भने “एकै समयमा, हामी नागरिक परमाणु ऊर्जा र अन्तरिक्षजस्ता क्षेत्रमा हाम्रो सहयोगलाई पनि अगाडि बढाउनेछौँ।”

दुवै नेताले भ्रमणलाई व्यापार र प्राविधिक सहयोगलाई प्रगाढ बनाउने उद्देश्यका साथ गरिएका पहलहरूको रूपमा घोषणा गरे ।

उनीहरूले स्वतन्त्र व्यापार सम्झौताको दिशामा प्रगति, लगानी र नवीनताका माध्यमहरू विस्तारका बारेमा छलफल भएका बताए । सेमीकन्डक्टर र कृत्रिम बौद्धिकतादेखि डिजिटल भुक्तानी एकीकरणसम्मका लागि भारतको ‘यूपीआई प्रणाली’लाई इजरायली बजारमा ल्याउने सहमति भएको पनि प्रधानमन्त्री मोदीले बताए ।

इजरायली अधिकारीहरूले यो भ्रमणलाई एक बलियो र विस्तारित साझेदारीको अभिव्यक्तिको रूपमा चित्रण गरेका थिए र नेतान्याहूले मोदीलाई ‘एक मित्रभन्दा बढी, एक भाइ’ को रूपमा वर्णन गरेका थिए ।

नेतान्याहुले बिहीबार मोदीको छेउमा उभिएर भने “भविष्य जसले नवीन आविष्कार गर्छन् उनीहरूको हो र इजरायल र भारत नवप्रवर्तनमा तल्लीन छन् ।”

उनले भने “हामी गर्व गर्छौं प्राचीन सभ्यताहरू, हाम्रो विगतमा धेरै गर्व गर्दछौं। तर भविष्यलाई नियन्त्रणमा राख्न पूर्ण रूपमा दृढ सङ्कल्पित छौँ, हामी यसलाई अझ राम्रो गर्न सक्छौँ ।”

बिहीबार दुई नेताको उपस्थितिमा दुई देशबीच शिक्षा, भौगोलिक अन्वेषण र कृत्तिम बौद्धिकता (एआई) का क्षेत्रमा दर्जनभन्दा बढी सम्झौतामा हस्ताक्षर भएको थियो ।

मध्यपूर्व र गाजा द्वन्द्व वरपरको तनाव शान्त गर्न यस क्षेत्रमा कूटनीतिक पहल जारी राखेका बेला मोदीको भ्रमण भएको हो ।