अप्राकृतिक गठबन्धन र सत्ताका लागि सम्झौता नगर्ने काँग्रेसको प्रतिबद्धता

काठमाडौँ । नेपाली काँग्रेसले पार्टीका निवर्तमान सभापति शेरबहादुर देउवाले लामो समय पार्टीमा गरेको नेतृत्वप्रति आभार व्यक्त गरेको छ ।

शनिवार काठमाडौँमा बसेको पार्टीको नव निर्वाचित केन्द्रीय कार्य समितिको बैठकले देउवाले पार्टीमा पुर्याएको योगदानको उच्च कदर गर्दै आभार व्यक्त गरेको हो ।

उनले पार्टीमा पुर्याएको योगदानको मूल्यांकन गर्दै बैठकले आभार व्यक्त गर्ने निर्णय गरेको पार्टीका प्रवक्ता देवराज चालिसेले जानकारी दिए । त्यसैगरी बैठकले पदमा नरहेर पनि पार्टीमा नेतृत्व प्रदान गर्दै आएका नेताहरुबाटआगामी दिनमा पनि अभिभावकीय भूमिका अझ बढी सक्रिय भएर लाग्न आग्रह गरेको छ ।

बैठकले कुनैपनि अप्राकृतिक गठबन्धन र सत्ताका लागि सम्झौता नगर्ने प्रतिबद्धता समेत व्यक्त गरेको प्रवक्ता चालिसेले बताए ।

उनले भने ‘यो अवस्थामा विशेष गरेर पार्टीमा निष्क्रिय रहनु भएका हाम्रा साथीहरू, विभिन्न कारणले पार्टी छाड्नु भएका साथीहरूलाई हामी फेरी पनि पार्टीमा जोडिनका लागि यो बैठकले आह्वान गरेको छ । राजनीतिमा चासो राख्दै यसको माध्यमबाट देशले परिवर्तन गर्न सक्छ भन्ने मान्यतामा विश्वास गरेर नेपाली काँग्रेसका नेतृत्वमा अगाडि बढ्ने प्रक्रियामा साथ र सहयोगका लागि देशवासीहरूबाट साथ प्राप्त हुने विश्वास पनि यो बैठकले राखेको छ । त्यसै गरेर विशेष गरी हाम्रा आदरणीय पूर्वसभापति श्री शेरबहादुर देउवाज्यूले लामो समयसम्म नेपाली काँग्रेसको नेतृत्व लिनु भयो । योगदान पुर्याउनुभयो । उहाँको हार्दिकतापूर्वक उच्च कदर गर्दै उच्च मूल्यांकन गर्दै उहाँका प्रति हार्दिक आभार व्यक्त गर्ने निर्णय यो बैठकले गरेको छ । र, उहाँका प्रति आगामी दिनमा यो केन्द्रीय समिति र नेपाली काँग्रेसलाई आदरणीय शेरबहादुर देउवाज्यूको अभिभावकीय भूमिका प्राप्त हुने विश्वास हामीले राखेका छौ । यसै गरेर हाम्रा अग्रज नेताहरू जो हाम्रा पार्टीको विभिन्न पदमा हुनुहुन्न । तर पनि पार्टीको नेतृत्व दिईआउनु भएको छ । सबै आदरणीय नेताहरूको भूमिकालाईअझ बढी सक्रियताका साथ पार्टीमा लागिरहनु पनि हामीले अनुरोध गरेका छौ । अन्त्यमा नेपाली नागरिकप्रतिको आफ्नो अटल प्रतिबद्धतालाई पुन दोहोर्याउन चाहन्छ कि अव कुनै अप्राकृतिक गठबन्धन वा सत्ता केन्द्रित सम्झौता हामी गर्ने छैनौ भनेर फेरी पनि हामीले कमिटमेन्ट गरेका छौ । सबै सदैव मूल्य र सिद्धान्तमा अडिग रहनेछौ । संविधानको रक्षा गर्दै समृद्ध नेपालको नेतृत्व गर्नेछौ । नव युवाको आकांक्षा विशेष गरेर जेनजी आन्दोलनपछि नव युवाको जुन आकांक्षा छ । त्यो आकांक्षाको प्रतिनिधित्व गर्दै जनताको अपेक्षालाई साकार पार्न यो बैठकले आफ्नो दृढता व्यक्त गरेको कुरा यहाँहरू समक्ष निवेदन गर्न चाहन्छु ।’

बैठकले मुलुकलाई समृद्ध बनाउने नेतृत्व आफूहरूले गर्ने भन्दै साथ दिन पनि सबैमा अपिल गरेको छ ।