भक्तपुर-२ : महेश बस्नेत सर्वसम्मत उम्मेदवार सिफारिस

काठमाडौं । आगामी फागुन २१ गते हुने प्रतिनिधि सभा निर्वाचनका लागि भक्तपुर क्षेत्र नम्बर २ मा नेकपा (एमाले) ले पार्टी सचिव महेश बस्नेतलाई अघि सार्ने निर्णय गरेको छ । आइतबार राति सम्पन्न पार्टीको क्षेत्रीय समन्वय समितिको बैठकले बस्नेतको नाम ‘एकल र सर्वसम्मत’ उम्मेदवारका रूपमा सिफारिस गरेको हो ।

उक्त क्षेत्रमा बस्नेतका साथै अनुभवी नेता राजेन्द्र राजथला र युवा नेता अनिल श्रेष्ठले पनि उम्मेदवारीको दाबी प्रस्तुत गरेका थिए । तर, पार्टीको जित सुनिश्चित गर्न र सिफारिस प्रक्रियालाई सहज बनाउन भन्दै दुवै नेताले आफ्नो दाबी फिर्ता लिएपछि बस्नेतको नाममा सर्वसम्मति जुटेको हो ।

निर्णय लगत्तै पूर्वमन्त्री समेत रहेका बस्नेतले सामाजिक सञ्जालमार्फत भावनात्मक सन्देश लेख्दै दाबी छाड्ने सहकर्मीहरूप्रति आभार प्रकट गरेका छन् । उनले लेखेका छन्, ‘मेरो नाम सर्वसम्मत एकल उम्मेदवार सिफारिसको प्रक्रियालाई सहज बनाउन दाबेदारी त्याग गर्नुहुने अनुभवी नेता राजेन्द्र राजथला तथा ऊर्जाशील युवा नेता अनिल श्रेष्ठप्रति हार्दिक धन्यवाद व्यक्त गर्दछु ।’