नेपाल स्काउटका निर्देशक भट्टराईले महिलामाथि दुर्व्यवहार गरेको आरोप

काठमाडौं । सामाजिक हितका लागि स्थापित संस्था हो, नेपाल स्काउट । तर, पछिल्लो समय यो संस्था विवादित बन्न पुगेको छ । नेपाल स्काउट पदाधिकारीबिचको टकराबले ठप्प जस्तै अवस्थामा छ ।

बालबालिका तथा युवा वर्गलाई नेपाल स्काउटको माध्यमद्वारा कर्तव्य परायण, अनुशासित, स्वावलम्बी, सच्चरित्रवान तथा सुयोग्य नागरिक बनाउने स्काउटको उद्देश्य भए पनि त्यस अनुरूप भने स्काउट अघि बढेको देखिँदैन । उल्टै संस्थाकै जिम्मेवार व्यक्तिले नै चरित्रहीन गतिविधि गर्ने गरेको पाइएको छ ।

नेपाल स्काउटमा आबद्ध एक महिलाले निर्देशक रामप्रसाद भट्टराईले आफूमाथि दुव्र्यवहार गरेको बताएपछि भट्टराई विवादमा मुछिएका छन् ।

निर्देशक भट्टराईले नेपाल स्काउटका महिला कर्मचारीहरूमाथि मानसिक तथा आपत्तिजनक व्यवहार गर्ने गरेको ती महिलाले आरोप लगाएकी हुन् ।

स्काउटमा आबद्ध एक महिलाले सामाजिक सञ्जालमार्फत निर्देशक भट्टराईले गरेको दुव्र्यवहारबारे उल्लेख गरेपछि उक्त घटना सार्वजनिक भएको हो ।

ती महिलाले सामाजिक सञ्जाल फेसबुकमा भिडिओ पोष्ट गर्दै निर्देशक भट्टराइले आफूमाथि दुव्र्यवहार गरेको घटनाबारे उल्लेख गरेकी हुन् । निर्देशक भट्टराईले आफूलाई दुव्र्यवहार, गालीगलौज, धाक धम्कीका साथै अपमानजनक व्यवहार गर्ने गरेको उनले भिडिओ तथा फेसबुक स्टाटसमा उल्लेख गरेकी छन् ।

यति मात्रै होइन, ती महिलाले भट्टराईलाई भ्रष्टाचारी समेत रहेको आरोप लगाएकी छन् । उनले स्काउटमा कार्यरत अन्य कर्मचारीलाई पनि विभिन्न बहानामा यातना दिने गरेको बताइन् ।

भट्टराईले संस्थामा कार्यरत सक्षम व्यक्तिलाई खतरा ठान्ने गरेको उल्लेख गर्दै भट्टराईका विरुद्धमा बोल्ने कर्मचारीलाई यातना दिने गरेको ती महिलाको आरोप छ ।

व्यक्तिगत तथा पेसागत छवि पूर्ण रुपमा नष्ट पार्दै संस्थामा विषाक्त वातावरण सिर्जना गर्ने भट्टराईको प्रवृत्ति रहेको ती महिला बताउँछिन् । भट्टराईको यही कार्यशैलीले स्काउटमा कार्यरत कर्मचारीहरू राजीनामा दिन बाध्य हुने गरेको उनले खुलासा गरिन् ।

उनले भिडिओमा भनेकी छन्– ‘यस प्रकारको व्यवहारले धेरै कर्मचारी तथा स्वयंसेवकलाई संस्थाबाट अलग हुन बाध्य बनाएको छ । जसका कारण सार्वजनिक हितमा पनि असर पुगेको छ ।’

भविष्यमा नेपाल स्काउटभित्र खराब अभ्यास दोहोरिन नदिन निर्देशक भट्टराईको सत्य बाहिर ल्याउन आवश्यक रहेको पनि उनले बताएकी छन् ।

निर्देशक भट्टराईले मानसिक र अन्य यातना दिएकी यी एक्ली महिला भने होइनन् । स्काउटमै कार्यरत अन्य कर्मचारीलाई पनि भट्टराईले विभिन्न बहानामा यातना र धाक धम्की दिने गरेको त्यहाँ कार्यरत कर्मचारीहरू बताउँछन् ।

स्काउटमा कार्यरत कर्मचारीहरूलाई निर्देशक भट्टराईले मन्त्रालय र खेलकुदमन्त्रीको योजनामा कामबाट निकाल्ने गरेको बताइएको छ ।

यता, निर्देशक भट्टराई भने आफूमाथि लगाइएका आरोपहरू निराधार रहेको बताउँछन् । उनले आफ्नो चरित्रहत्या गर्ने उद्देश्यले भ्रम फैलाइएको बताए ।

‘म माथि लगाइएका आरोपहरू सबै सरासर झुट हुन् । त्यस्तो कुनै विषय भए आधिकारिक हिसाबले प्रक्रियामा जान सकिन्छ,’ उनले मकालुखबरसँग भने, ‘सामाजिक सञ्जालमा राखेर अरूको चरित्रहत्या गर्ने काम भइरहेको छ, यो सरासर झुट छ ।’

आफूमाथि लगाइएका आरोपहरू कार्यालयबाट हटाउनका लागि गरिएको प्रपञ्च मात्रै भएको उनी बताउँछन् । ‘म माथि लगाइएका आरोपहरू मलाई निलम्बन गर्ने देखी लिएर कार्यालयबाट जसरी पनि हटाउनका लागि भएको एउटा प्रपञ्च हो । मलाई हटाउन हतियारका रुपमा प्रयोग गरिएको छ,’ उनले भने ।

उनले आफ्नो चरित्रहत्या गर्ने गरी लगाइएका आरोपहरू निराधार विषय मात्रै रहेको बताए । उनले त्यस्ता केही विषय भए कानुनी रुपमा उपचार खोज्न समेत आग्रह गरे ।

‘यो विषय निराधार हो । कपोकल्पित र चरित्रहत्या गर्ने किसिमले आएको विषय हो, त्यस कारण यस विषयमा धेरै चर्चा गरिराख्नुपर्दैन,’ निर्देशक भट्टराईले भने, ‘यो क्यारेक्टरको विषयको प्रश्न हो । मेरो बेल्कुल चरित्र हत्या गर्ने हिसाबले आएको विषय हो । त्यसैले यसमा धेरै चर्चा परिचर्चा गर्न जरुरी छ जस्तो मलाई लाग्दैन ।’

उनले आफूमाथि लगाइएको मानव तस्करको आरोप पनि निराधार रहेको बताए । उनले आधारसहितको आरोप भएको भए यो विषय अदालतमा जानुपर्ने बताए ।

तर, चरित्र हत्या गर्ने उद्देश्यले आफूलाई झुटा आरोप लगाइएको उनले बताए । समग्रमा आफूलाई नेपाल स्काउटबाट हटाउनका लागि प्रपञ्च भइरहेको उनले बताए ।

‘आधारसहितको आरोप भएको भए यो विषय त अदालतमा जान्थ्यो होला । कानुन नियमन गर्ने निकायमा जान्थ्यो होला । कसैले उजुरबाजुर गथ्र्यो होला । म तपाईँलाई पनि आरोप लगाउन सक्छु । म तपाईँलाई आरोप लगाएर भोली एउटा मिडियामा न्यूज लेख्छु । त्यो त भएन नि,’ निर्देशक भट्टराईले भने ।

कुनै पनि आधार प्रमाणविना कसैको चरित्रहत्या गर्ने गरी आरोप लगाउनु राम्रो नभएको उनको भनाई छ ।

यता, निर्देशक भट्टराईमाथि लागेको आरोपबारे नेपाल स्काउटका प्रमुख आयुक्त महेन्द्रराज रञ्जितले अनविज्ञता प्रकट गरे ।

उनले भट्टराईमाथि लागेको आरोपबारे बुझेर अघि बढ्ने प्रतिक्रिया दिए । ‘यस विषयमा हामी बुझेर,छलफल गरेर अगाडि बढ्छौँ । के–कसो हो बुझ्छौँ र त्यसपछि अघि बढ्छौँ’ उनले भने ।

यसअघि विवादित व्यक्ति निर्देशक जस्तो गरिमामय पदमा रहनु उचित नरहेको भन्दै गत पुस २६ गते नेपाल स्काउटका निर्देशक भट्टराई तीन महिनाका लागि निलम्बनमा परेका थिए ।

पटक–पटक सचेत गराउँदा समेत भट्टराईले गैर कानुनी कार्य गरी संस्थालाई हानी नोक्सानी गरेकाले कार्यालय प्रमुखको जिम्मेवारीमा राख्दा संस्थालाई नोक्सानी हुने भएकोले प्रमुख आयुक्त स्तरीय निर्णय गर्दै रञ्जितले निलम्बन गरेका थिए ।

बैठकमा छलफलै नभएको विषयमा नेपाल स्काउटलाई दीर्घकालीन आर्थिक भार पर्ने गरी विभिन्न व्यक्तिलाई राष्ट्रिय परिषद् बैठकको निर्णयको हवाला दिई नियुक्ति गरेकाले भट्टराईलाई निलम्बन गरिएको प्रमुख आयुक्त रञ्जितले बताएका थिए ।

तर, नेपाल स्काउटका प्रमुख स्काउट समेत रहेका युवा तथा खेलकुद मन्त्री तेजुलाल चौधरीको लिखित निर्देशनपछि निलम्बित निर्देशक भट्टराई फेरी जिम्मेवारीमा फर्किएका हुन् ।

खेलकुदमन्त्रीको चौधरीको आडमा उनले स्काउटमा आफू अनुकूलका निर्णय गर्दै आएका छन् । उनले स्काउटका ऐन, नियम संशोधन नै गरेको आरोप छ । विवादित छवि भएका भट्टराईका गलत कामले नेपाल स्काउटको गरिमा नै संकटमा परेको छ ।