केएमसीद्वारा ३६ सय बिरामीको निःशुल्क उपचार

काठमाडौं । काठमाडौं मेडिकल कलेज (केएमसी)ले काठमाडौं र खोटाङका तीन स्थानमा सञ्चालन गरेको निःशुल्क स्वास्थ्य शिविरबाट ३ हजार ६ सय ८३ जना बिरामी लाभान्वित भएका छन् ।

खोटाङको हलेसी तुवाचुङ्ग नगरपालिका-७, रावावेसी गाउँपालिका-१ हरनटार कुभिन्डे र काठमाडौं-३१ भीमसेन गोलामा स्थानीय संघसस्थासँग सहकार्य गरी एक/एक दिन निःशुल्क स्वास्थ्य शिविर सञ्चालन गरिएको केएमसीले जनाएको छ ।

खोटाङको हलेसी तुवाचुङ्गको शिविरमा १ हजार ३ सय ५६, रावावेसीमा १ हजार ४ सय ५५ र काठमाडौंको भीमसेन गोलामा सञ्चालित शिविरमा ८ सय ७२ जना विरामीको निःशुल्क उपचार गरिएको केएमसीका जेनेरल मेनेजर नारायण दाहालले जानकारी दिए ।

शिविरहरुमा केएमसीका बिशेषज्ञ डाक्टरहरुले विरामीको स्वास्थ्य परीक्षण गर्नुका साथै इसीजी, ल्याब र भिडियो एक्सरेसहित सामान्य शल्यक्रिया पनि गरेका छन् । तीन वटै शिविरमा ४८७ जनाको इसीजी, ५३२ को ल्याब टेष्ट र ५१३ को भिडियो एक्सरे गरिएको जनाएको छ ।

यता, दाँतमा समस्या भएका ६७ जनाको दाँत खोलिएको छ भने २० जनाको सामान्य शल्यक्रिया गरिएको केएमसीले जनाएको छ ।

ग्रामिण क्षेत्रका विपन्न विरामीलाई लक्षित गरी केएमसीले पछिल्लो समय बिभिन्न जिल्लामा निःशुल्क स्वास्थ्य शिविरलाई सञ्चालनलाई निरन्तरता दिइरहेको जनाएको छ ।