नौ महिनापछि नेपाल–भारतबीच उडान सुरू हुँदै

काठमाडौं । काेराेना भाइरस (काेभिड १९) संक्रमणकाे त्रासका बिच बन्द भएकाे नेपाल-भारत उडान सुरू हुने भएकाे छ ।

भारतमा बढ्दाे संक्रमणका कारण सुचारू हुन नसकेकाे नेपाल-भारत हवाई उडान नाै महिनापछि खुल्न लागेकाे हाे ।

नेपाल र भारतीय नागरिक मात्रै यात्रा गर्न पाउने गरी दुई देशबीच पुनः हवाई सुचारु हुन लागेकाे नेपाल नागरिक उड्डयन प्राधिकरणका प्रवक्ता राजकुमार क्षेत्रीले जानकारी दिए । उनका अनुसार नेपाल एयरलाइन्स र एयर इन्डियाले मात्रै हवाई उडानकाे अनुमति पाएका छन् ।

एयर इन्डियाले तालिकाको लागि आग्रह गरेपछि नेपालले तालिका दिनेछ । अबकाे एक साताभित्र उडान सुरू हुने जानकारी दिइएकाे छ । सम्भवतः डिसेम्बर १७ देखि उडान हुन सक्ने बताइएकाे छ ।