तस्करसँगको झडपमा प्रहरीले गोली चलायो, तीन प्रहरीसहित एक बालक घाइते

काठमाडौं । बाराको सुवर्ण गाँउपालिका-२ मा झडप हुँदा प्रहरीले गोली चलाएको छ । भारतबाट राजश्व छलेर ल्याइएको आठ बोरा प्याजसहित चारवटा मोटरसाइकल प्रहरीले नियन्त्रणमा लिएपछि झडप भएको थियो ।

झडप नियन्त्रणका लागि प्रहरीले चलाएको गोली लागेर स्थानीय चन्देश्वर यादवका छोरा १४ वर्षीय रन्जन यादव घाइते भएका छन् । टाउकोमा गोली लागेका बालकको वीरगन्जस्थित नारायणी बयोधा अस्पतालमा उपचार भइरहेको छ ।

तस्करको समूहलाई सघाउँदै स्थानीयले प्रहरीमाथि ढुंगामुढा गर्दा प्रहरी नायव निरीक्षकसहित तीनजना प्रहरी घाइते भएका छन् । जिल्ला प्रहरी कार्यालय बाराका प्रहरी निरीक्षक सुरेन्द्र यादवका अनुसार स्थानीयको ढुंगामुढाबाट प्रहरी नायव निरीक्षक वीरेन्द्र गिरी, हवल्दार र जवान घाइते भएका हुन् । घाइते प्रहरीको कलैयास्थित जिल्ला अस्पतालमा उपचार भइराखेको छ ।

घाइतेमध्ये प्रहरी नायव निरीक्षक गिरीको अवस्था गम्भीर छ । स्थिति नियन्त्रणका लागि गोली चलाउँदा बालकलाई गोलीको छर्रा लागेको प्रहरी निरीक्षक यादवले बताए । प्रहरीले झडप नियन्त्रणक लागि १२ राउण्ड हवाइ फायर गरेको थियो ।

प्रतिक्रिया