कूटनीतिक मर्यादा मिच्दा विवादित बने राजदूत पाण्डे
मकालु खबर
काठमाडौं । चीनका लागि नेपाली राजदूत महेन्द्रबहादुर पाण्डे कूटनीतिक मर्यादा मिचेर अभिव्यक्ति दिएको भनी विवादित बनेका छन् । नेपाल सरकारको परराष्ट्रमन्त्री भइसकेका पाण्डेले चिनियाँ सरकारी मुखपत्र ग्लोबल टाइम्सलाई दिएको अन्तर्वार्तामा भारतबारे नकारात्मक टिप्पणी गरेपछि विवादमा तानिएका हुन् ।
राजदूत पाण्डेले नेपाल–भारत सीमा विवादजस्ता विषयबारे टाइम्सलाई दिएको अन्तर्वार्तामा भारतीय सञ्चारमाध्यमले नकारात्मक समाचार प्रकाशित गरे पनि नेपाल र चीन सम्बन्ध सौहार्दपूर्ण रहेको बताएका थिए ।
राजदूत पाण्डेको उक्त अभिव्यक्ति प्रकाशित भएपछि कूटनीतिक जानकारसँगै परराष्ट्र मामिला जानकार तथा नेताहरुले त्यसलाई कूटनीतिक मर्यादाविपरीत भनिरहेका छन् ।
‘आजकल कसले ख्याल गर्छ ?’
पूर्वपरराष्ट्र सचिव तथा कूटनीतिक मामिला विज्ञ मधुरमण आचार्यले सामान्यतयाः एक देशको राजदूतले अर्को देशसँगको सम्बन्धका बारेमा नकारात्मक टिप्पणी गर्न नपाउने बताएका छन् ।
नाम नतोकेर तर राजदूत पाण्डेकै ट्वीट्लाई इङ्गित गर्दै ट्वीट गरेका आचार्यले आजभोलि यसको ख्याल कसैले पनि नगरेको बताएका छन् ।
‘‘सामान्यतयाः कुनै देशका लागि एक राजदूतले अर्को देशसँगको सम्बन्धको बारेमा नकारात्मक कुरा गर्न पाउँदैनन् । यद्यपि बोलिएका कुराहरु तथ्यपरक नै किन नहुन् । ‘तर आजकल कसले ख्याल राख्छ ?’ आचार्यले लेखेका छन् ।
‘राजदूतको अभिव्यक्ति नै सरकारको आधिकारिक धारणा हो ?’
Normally, an ambassador to a country is not allowed to talk negatively about the relations with another country to which he or she is not accredited, even if they are factual.
That is when diplomatic norms are applied. But who cares nowadays?
— Madhu Raman Acharya (@MadhuRamanACH) September 29, 2020
‘सरकारको आधिकारिक धारणा हो ?’
राजदूत पाण्डेको उक्त अभिव्यक्ति सार्वजनिक भएपछि कांग्रेस नेता गगन थापाले पनि आपत्ति जनाएका छन् । नेता थापाले अन्तर्राष्ट्रिय सम्बन्धजस्तो संवेदनशील विषयमा राजदूतबाट आएको हलुका टिप्पणी सदाका लागि अवान्छनीय हुने बताएका छन् ।
‘अन्तर्राष्ट्रिय सम्बन्धजस्तो संवेदनशील विषयमा राजदूतबाट हलुका टिप्पणी सदा अवान्छनीय हुन्छ । यतिखेर भारत–चीन, नेपाल–भारत र नेपाल–चीन सम्बन्ध यथास्थितिभन्दा अलि फरक र जटिल बन्दै गएको छ । यो समयमा राजदूत पाण्डेको गैरजिम्मेवार अभिव्यक्तिले नेपालको कूटनीतिक कौशलमा समेत प्रश्न उठाउँछ ।’ नेता थापाको टिप्पणी छ ।
यस्तै थापाले आफ्नो फेसबूक स्थितिमा उक्त अभिव्यक्ति नेपाल सरकारको आधिकारिक धारणा होकि होइन भनी प्रश्नसमेत गरेका छन् ।
https://www.facebook.com/thapagk/posts/3472337816143439
मकालु खबर
