आइसिसी टी–२० वरीयताः पारस र सन्दीपको खस्कियो स्थान, वरीयतामै परेनन् बसन्त र अभिनास

कार्तिक २५, काठमाडौं । आइसिसी टी–२० वरीयतामा नेपाली राष्ट्रिय क्रिकेट टोलीका पूर्व कप्तान  पारस खड्का र सन्दीप लामिछानेको वरीयता खस्किएको छ ।   

अन्तर्राष्ट्रिय क्रिकेट परिषद् ‘आइसिसी’ ले जारी गरेको नयाँ वरीयतामा पारस खड्का र सन्दीप लामिछानेको वरीयता खस्किएको देखिएको हो ।   

खड्का नयाँ वरीयता अनुसार ब्याटिङमा ५५ औं स्थानमा छन्। यसअघि पारस वरीयतामा ४५ औं स्थानमा थिए । उनले ब्याटिङमा पाकिस्तानका पूर्वकप्तान सर्फराज अहमेद अस्ट्रेलियाका स्टीभ स्मिथ, वेस्ट इन्डिजमा क्रिस गेललगायतका खेलाडीहरुलाई पछि पारेका छन्।   

त्यस्तै अलराउन्डरतर्फ खस्किएर ३२ औं स्थानमा पुगेका छन्। पारसले अल राउन्डरमा राशिद खान, किम पाउल,  रोहित शर्मा लगायतका खेलाडीलाई पछि पारेका छन् । अराउन्डरमा सोमपाल कामी ६७ औं स्थानमा रहँदा करण केसी ८८ औं स्थानमा छन्।  

त्यस्तै बलिङतर्फ सन्दीप पनि ६८ औं स्थानमा झरेका छन् । अघिल्लो पटक सन्दीप ६४ औं स्थानमा रहेका थिए । बलिङतर्फ अर्का खेलाडी सोमपाल कामी ८५ औं र करण १०० औं स्थानमा रहेका छन् । यसअघि सोमपालको वरियता ६८ र करणको ८३ रहेको थियो ।  

यसअघि वरीयतामा रहेका बसन्त रेग्मी र अभिनास बोहोरा वरीयतामा परेनन् । अघिल्लो वरियतामा बसन्त ९० औं र अविनाश १०० औं स्थानमा रहेका थिए ।