मंसिर १५ र २४ गते जोर–बिजोर प्रणाली, कुन–कुन सवारीमा लागु हुन्छ ?
मकालु खबर
मंसिर १३, काठमाडौं । मंसिर १५ र २४ गते काठमाडौं उपत्यकामा गुड्ने सवारीमा जोर–बिजोर प्रणाली लागु हुने भएको छ ।
१३ औं दक्षिण एसियाली खेलकुद (साग) मा ट्राफिक व्यवस्थापनका लागि महानगरीय ट्राफिक प्रहरी महाशाखाले उद्घाटन र समापनका दिन उपत्यकाका सवारी साधनमा जोर बिजोर प्रणाली लागू गर्ने भएको हो ।
सार्वजनिक र निजी दुवै सवारी साधनको हकमा यो नियम लागू हुने महानगरीय ट्राफिक प्रहरी महाशाखाले जनाएको छ ।
ट्राफिक प्रहरीका अनुसार मंसिर १५ बिजोर नम्बर भएका सवारी साधनमात्र चल्न पाउनेछन् भने २४ गते जोर नम्बर भएका सवारी साधनमात्र चल्नेछन्।
जोर बिजोरको गणना अन्तिम अंकबाट निर्धारण हुनेछ ।
आइतबारदेखि १३ औं दक्षिण एसियाली खेलकुद (साग) सुरु हुँदैछ ।
खेलमा नेपालबाट ५ सय ९९ जना खेलाडीहरुले सहभागीता जनाउने छन् । जसमा ३ सय १२ पुरुष र २ सय ८७ महिला खेलाडीहरु छन् ।
आर्चरी, एथलेटिक्स, ब्याडमिन्टन, बक्सिङ, फेन्सिङ्ग, जुडो, कराँते, शुटिङ्ग, स्क्वास, पौडी, टेबलटेनिस, तेक्वान्दो, टेनिस, भारोत्तोलन, उसु, कुस्ती, भलिबल, विच भलिबल, फुटबल, ह्याण्डबल, बास्केटबल, ३ इन्टु ३ बास्केटबल, खो खो, ट्राइयाथोलन, कबड्डी, क्रिकेट, गल्फ, साइक्लिङ्गमा प्रतिस्पर्धा हुनेछ ।
खेलहरु काठमाडौं, ललितपुर, पोखरा र जनकपुरमा हुनेछन् ।
राखेपले प्रतियोगिताको प्रशारण अधिकार भारतीय कम्पनी नक्षत्र न्युजलाई बेचिसकेको छ । प्रतियोगिताका अधिकांश खेल नेपाल टेलिभिजनमा प्रत्यक्ष हेर्न पाइनेछ ।
मंसिर २४ गते खेल समापन हुनेछ । सोही दिन विदेशी पाुहनाहरुलाई बिदाई गरिने छ ।
मकालु खबर
